法國邊緣人 破冰趕搭尾班車

猪拉多纳

今晚法國會喺華倫西恩斯主場同冰島拍跳備戰歐國盃，據講領隊白蘭斯將大派副選上陣，希望畀班邊緣國腳爭上尾班車，兼睇辦挑選正選陣容，睇落戰意唔曳。對住啱啱換帥、靠一個基菲爾施古臣孭飛嘅冰島，贏兩粒無難度，一於捧1.41倍「讓球主勝」！（now630、632及714台周一凌晨3:00直播）
前鋒雷米腳傷退隊

2010年世盃經歷罷操風波嘅法國，自從由白蘭斯執教後脫胎換骨，唔經唔覺已保持18場不敗。法國嚟緊會踢3場熱身賽備戰，包括今晚對冰島、6月1號對塞爾維亞同6月5號對愛沙尼亞。

法國早前公布27人初選名單，繼熱刺中堅卡保奧後，馬賽前鋒雷米尋日亦因腿筋傷冇好轉被迫退隊，但仲剩番25人。領隊白蘭斯為選最後23人大軍，今晚對冰島打算大派副選上陣。據法國傳媒報道，白蘭斯仲會順便試埋4231同442兩個陣式，同時睇吓右閘、左閘、中場同右中場4個競爭激烈位置邊個最適合踢正選，你話一班球員點敢揸流攤？特別係相隔2年重返國家隊嘅紐卡素翼鋒賓艾化，今晚落場一定加多兩錢肉緊。
冰島二打六孭飛冇起色

由於早前喺歐國盃外圍賽H組排尾二出局，冰島喺上年10月改由前瑞典國家隊領隊拿格碧克執教，但佢老人家接手後冰島表現未見好轉，先後作客以1:3不敵日本同1:2輸畀黑山。鬼咩！冰島隊波目前同國家經濟一樣咁蕭條，大部分球員効力挪超瑞超等次級聯賽，全隊最勁就只得踢英超史雲斯嘅中場基菲爾施古臣，但踢波始終係講整體，今晚作客矢志要壯聲威嘅法國，輸兩粒可謂最低消費。
橫數千軍

法國18戰不敗

 ‧近18場不敗，獲12勝6和，包括作客擊敗德國。

 ‧近6次交手未輸過，獲5勝1和。

 冰島近戰失波多

 ‧近8場1勝1和6負，有5場失2球或以上。

 ‧世界排名131，比排16位嘅法國低115位。

猪拉多纳