西班牙打虎失「細」

猪拉多纳

今晚至聽朝上演名牌熱身賽三部曲，西班牙、荷蘭及巴西輪流登場，首部曲由西班牙喺中立場瑞士出戰南韓。「鬥牛兵團」嘅巴塞球員捧完西班牙盃冠軍後，獲領隊迪保斯基批准，只需要趕及六月一日前歸隊就得，因此近日四出做善事同度假。西班牙仍未處於最佳人腳及作戰心態，未必咬得入鬥志頑強嘅「太極虎」，捧入球細。（now 632及630周四凌晨2時直播）

由於巴塞同畢爾包球員剛踢完西班牙盃決賽冇耐，迪保斯基特別畀佢哋抖到六月一日，巴塞中場沙維及門將域陀華迪斯仲去咗非洲加蓬做善事。當然唔排除部分巴塞及畢爾包球員比較勤力會提早歸隊，但難免有疲態。尤其係巴塞今季征戰頻繁，不但聯賽、歐聯及西班牙盃三線作戰，期間仲要踢世冠盃，根本唔夠時間休息。
兩年前交手僅勝1:0

迪保斯基當然明白呢個問題，即使巴塞兵提早歸隊，亦未必派佢哋上陣。西班牙近年靠巴塞兵打天下，巴塞球員一日未處於最佳作戰狀態，西班牙只屬無牙老虎。

南韓今次擁有池東沅、寄誠庸、孫弘民、具滋哲等「海外兵團」助陣，相比疲兵西班牙，「太極虎」最大優勢就係體力雄渾、鬥志頑強，難得同世界盃冠軍交手，更加會落力表演。事實上，南韓一向唔怕西班牙，九四及○二年世界盃雙方於九十分鐘內都打成平手，兩年前熱身賽，西班牙處於巔峰亦僅小勝一比○。加上熱身賽爆冷機會較高，西班牙熱W唔抵玩，捧入球細為妙。
西班牙近年對亞洲兵成績

年份 賽事 戰果

2010 熱身賽 中立場勝南韓1:0

2010 熱身賽 中立場勝沙特阿拉伯3:2

2009 洲國盃 中立場勝伊拉克1:0

2006 世界盃 中立場勝沙特阿拉伯1:0

2005 熱身賽 主場勝中國3:0