意大利劏俄試刀

猪拉多纳

近期備受假波醜聞纏繞嘅意大利，將於瑞士蘇黎世與俄羅斯進行熱身賽。基於早前發生地震災害，意大利未有與盧森堡進行「拍跳」，故此今場對俄羅斯成為意大利於歐國盃開波前唯一一場熱身賽。意大利集訓多時都冇正式比賽，成班球員都希望喺今場測試自己狀態，意軍有鬥志主Ｗ可捧。（now 632及630周六凌晨2時45分直播）

自從意大利領隊柏蘭迪利公布三十二人集訓名單後，一直都係操練及講解戰術，並冇真正比賽，某程度上對國家隊係件好事。因為球員經過漫長球季之後，身心難免會感到疲累，一個短暫嘅休息可為球員帶來新鮮感。
壞孩子鋒線臭味相投

以近期操練所見，一對壞孩子卡斯辛奴及巴洛迪利，好有機會成為意大利正選前鋒組合，而巨高對呢個組合相當之期待。其實卡斯辛奴最鍾意就係同壞孩子合作，最佳例子就係AC米蘭嘅伊巴謙莫域。相對之下，巴洛迪利比起瑞典鋒霸更癲更喪更爛玩，同卡斯辛奴可謂臭味相投，相信「BA-CA」組合一定夾得嚟。
俄羅斯對賽往績輸蝕

俄羅斯喺五月份已經踢過兩場熱身賽，對手分別為烏拉圭及立陶宛，而兩場比賽結果都係和波收場，表現只係一般。尤其對住歐洲弱隊立陶宛都未能取得入球，似乎俄羅斯攻力唔係咁強。另外對賽往績方面，近四次對賽俄羅斯一和三負，擺明畀意大利剋死。