歐國盃：德國俄羅斯玩得過

猪拉多纳

2012歐國盃將於下星期六凌晨開波喇，十六路雄師蓄勢待發，準備爭奪呢項四年一度大賽冠軍殊榮。決賽周冇弱旅，爭標形勢錯綜複雜，要捧盃除咗講求實力及戰術等客觀因素之外，宿命、運氣、甚至金錢都可能左右大局，到底邊隊可以成為真命天子？而邊隊會先聲奪人以小組首名出線呢？依家就同大家作詳細分析，做定功課迎接呢項球壇盛事！
西班牙難逆天 輪到德國

西班牙王朝盛世，有力成為首支蟬聯歐國盃的球隊？未必。雖然有球隊（西德、法國、西班牙）曾連奪世盃及歐國盃，但從來冇一支球隊能連續兩屆歐國盃封王，強如92年「三劍俠」時代的荷蘭，都喺4強爆冷畀丹麥淘汰，就算衞冕嘅前蘇聯及西德於翌屆（64、76年）殺入決賽，最終均敗走而回。況且西班牙今屆有主力佩奧爾和韋拿因傷冇份踢，前後場需要重新磨合，想逆天而行蟬聯冠軍？冇可能。

究竟邊隊最有冠軍相？照運勢嚟睇，三屆盟主德國實屬天命所歸。首先，該隊有着每隔三屆、即16年便奪標的傳統（80、96年），他們上次靠比亞荷夫的黃金入球捧盃，與今屆相距剛好16年，此乃吉兆。其次，日耳曼軍團每逢屈居亞軍（76、92年），翌屆（80、96年）都能更上一層樓，咁蹺該隊於上屆決賽飲恨，睇嚟愈趨成熟的日耳曼軍團，係命中注定的真命天子。
歐國盃歷屆冠亞軍

年份 冠軍 亞軍

2008 西班牙 德國

2004 希臘 葡萄牙

2000 法國 意大利

1996 德國 捷克

1992 丹麥 德國

1988 荷蘭 蘇聯

1984 法國 西班牙

1980 西德 比利時

1976 捷克斯洛伐克 西德

1972 西德 蘇聯

1968 意大利 南斯拉夫

1964 西班牙 蘇聯

1960 蘇聯 南斯拉夫