傷殘英格蘭冇得「比」

猪拉多纳

喺新帥鶴臣麾下擊敗挪威打響頭炮嘅英格蘭，今晚喺溫布萊主場同比利時踢熱身賽，以為佢哋可以乘勝追擊咩？力奇實在有啲擔心！皆因佢哋啱啱再有林柏特因傷退隊，中場鬧兵荒，兼且鶴臣嘅訓練模式又畀老隊員質疑，對住中前場新星湧現嘅比利時點讓波？今場我一於捧2.25倍「讓球客勝」。（now671及672台、廣東體育周日凌晨0:15直播）
柏加有傷頂硬上靠唔住

之前已經有門將魯迪同中場巴利退隊，英格蘭尋日再有林柏特因拉傷大腿宣布退隊，唔踢歐國盃可能改踢奧運。球隊家陣同歐洲足協申請緊補選佐敦軒達臣入伍，環顧目前三獅兵陣中，中場咪只係得柏加同謝拉特兩個。最慘係有消息話上仗對挪威先復出嘅柏加，傷勢根本未好番晒，無論體能同狀態都未達高峰，今晚紮住上咪寄望太高。

仲有呀，帶慣細球會嘅鶴臣，又被指平時喺訓練場教波鬼咁嘮叨，當正班星級國腳係小將咁教，氣氛麻麻。雖然之後有朗尼出嚟澄清，話班老臣子並冇對鶴臣不滿，但空穴來風，話冇嘢都冇人信囉！

況且鶴臣領軍一向用死「442」陣式，家陣朗尼首2場分組賽停賽，佢練兵都只硬性安排艾舒利楊格做影子前鋒，拍住安祖卡路爾攻堅，呢個組合上仗對挪威唔見得好成功，今次搞唔搞得掂比利時好難講。唯一係包括門將赫特、車仔戰將好似艾殊利高爾、泰利同加利卡希爾等今仗都回歸復任正選，防線穩陣啲，但想靠佢哋贏波恐怕又唔係咁易。
比利時黃金新一代唔嘢小

對手比利時被譽為新黃金一代，夏薩特、盧卡古同韋素等新星天分高超，華美倫、高柏尼同費蘭尼就經驗與質素兼備，實力唔嘢小。看守領隊韋莫斯依家仲要同名將普荷美及吉列斯爭份主帥長約，今場梗係要交貨，就算高柏尼今晚要帶傷上陣，我都信佢哋撐得住唔輸。
橫數千軍

 英格蘭熱身賽4連單

‧近4場熱身賽均開入球單。

‧近4主場戰得3勝1負，但最近1仗不敵荷蘭。

 比利時旺開入球大

‧近6戰得2勝3和1負，5次開出入球大。

‧近4次鬥英格蘭有3次打和。