葡萄牙搖「其」吶喊壯行色

猪拉多纳

今年兩場友賽都食白果，葡萄牙對唔對得住班球迷呀？佢哋今晚喺里斯本出擊鬥土耳其，進行歐國盃前最後一場拍跳，連國會議員都入營探班，葡萄牙係時候做齣好戲，一於捧2.28倍「讓主」。（有線61、64、155、201、204及廣東體育周日凌晨2:45直播）

先喺2月同波蘭互交白卷，上場就畀馬其頓悶和0:0，不過差劣戰績未有影響陣營士氣，葡萄牙日前揀副隊長，估唔到個個都想做，最後般奴艾維斯、比比、拿尼同魯爾梅利斯獲委任做新副隊長。尋日C朗就叫咗比比陪佢出席發布會，比比公開話C朗唔係萬能，葡萄牙要喺歐國盃創一番成就嘅話，每位球員都要出一分力，鬥心似乎唔錯喎！
土耳其防線唔穩陣

今場波喺里斯本光明球場舉行，消息指効力賓菲加嘅射手尼爾遜米基爾好大機會擔正，家陣葡萄牙冇個前鋒靠得住，如果呢個生牯仔對辦，隨時奠定國家隊正選！據《球報》報道，今場波超過6萬張波飛晨早售罄，Fans都希望趁國家隊出發前造勢，國會議員米基爾利華斯尋日入營同成班國腳食晚飯，老將迪高亦話睇好拿尼大爆發，咁多人撐，葡萄牙點可以再令國民失望？

對手土耳其近3場友賽入7球，但對住格魯吉亞同芬蘭就總共失4球，以干路爾為首嘅豆腐防線備受批評，有前冇後隨時畀葡萄牙當靶！