阿根廷攻強守弱「瓜」得

猪拉多纳

世界盃南美洲區外圍賽重燃戰火，聽朝有場焦點戰由阿根廷主場迎擊厄瓜多爾，咪畀主隊美斯同阿古路嘅超級鋒線嚇親，查實佢哋一直攻得唔守得，對住決心穩守嘅厄瓜多爾，未必搵到甜頭。阿根廷讓波，安高今場決定敲冷博4.35倍「讓球客勝」！（有線61及201周日早上6:30直播）
厄瓜多爾打反擊搵到食

阿根廷聽朝喺河床體育館出戰，雖然話有主場之利，但真係咪睇得太高。冇錯，佢哋就算冇選到泰維斯同「大米」入伍，依然係巨星如雲，前線都仲有新球王美斯、曼城殺神阿古路同皇馬箭頭希古恩孭飛，賽前仲有消息話主帥沙貝拉會排「433」陣式強攻，但正如効力曼城嘅守將薩巴列達所講，阿根廷近年呈現攻強守弱情況，對上6場都有失波，前面入埋隨時唔夠輸。

事實上，阿根廷至今4戰都只係得2勝1和1負，只能同烏拉圭及委內瑞拉並列榜首，對手厄瓜多爾都只係以1分之差排第4，主隊根本唔係贏梗。再者，厄瓜多爾主帥魯達已經決定今仗排「451」陣式專心打反擊，佢哋前線賓尼達斯同曼聯快翼路爾斯華倫西亞，都係有單打獨鬥搶分能力，要偷雞都唔係冇可能。
南美洲區世盃外圍賽賽制：

9支參賽球隊踢雙循環分組賽，小組頭4名直接進身2014年巴西世界盃決賽周，第5名則與中北美洲區第4名進行主客兩回合附加賽，決定出線席位。