日本晒冷大起阿曼

猪拉多纳

世界盃外圍賽亞洲區第四圈開打，B組日本首戰主場鬥阿曼，主帥沙哲朗尼今次精銳盡出，王牌香川真司及本田圭佑等猛將都在陣中，面對亞洲二、三線球隊阿曼阻力唔大，有力大勝捧大盤！（now 670周日晚6時30分直播）

日本近年愈來愈多球員出國搵食，依家猛將如雲，今次主帥沙哲朗尼決定大晒冷，入選球員包括國米鐵閘長友佑都、史浩克右閘內田篤人、禾夫斯堡中場長谷部誠及史特加射手岡崎慎司等，當然唔少得盛傳將轉投曼聯嘅進攻中場香川真司，以及莫斯科中央陸軍左腳王本田圭佑啦，如此豪華陣容，問你點頂！

阿曼上圈分組賽六戰勝和負各二，勉強壓住褪色勁旅沙特阿拉伯晉級，作客澳洲淨吞三蛋都算喇，連造訪泰國都輸○比三，點搞啊！阿曼今場實疊埋心水死守，但鬥泰國都失三球，後防真係太弱，難阻日軍進襲，大敗機會甚高。