法卡奧哥倫比亞成功之秘

猪拉多纳

周一早上有場世界盃南美洲區外圍賽，秘魯主場對哥倫比亞，哥倫比亞係近年南美新興勢力，陣中射手法卡奧喺今季歐洲賽表現出眾，相反秘魯一班主力荷西古里路、法芬高峰已過，射手比沙路又因傷缺陣，主場讓唔起對手，捧「讓球客勝」。（周一早上６時開賽）

哥倫比亞今屆外圍賽三戰一勝一和一負，輸波對手係傳統勁旅阿根廷，表現唔算太失禮，事實上哥倫比亞近年出產唔少好球員，除咗炙手可熱嘅前鋒法卡奧之外，古亞連、山齊士摩蘭奴都極具質素，絕對有力衝擊前四爭取直接出線資格。秘魯頭三輪外圍賽輸兩場，表現平庸無奇，主場出擊都冇優勢，要讓波寧捧客軍。

另外兩場熱身賽，巴西於中立場美國對墨西哥，巴西兩連勝只因對手弱，墨西哥近年鬥巴西不落下風，捧「讓球客勝」。最後加拿大主場鬥美國，美國連續兩場熱身賽均開大盤，今鬥實力次一級嘅加拿大可續追。