日本強爆阿曼 「新生本田」 拍香川勝率80%

猪拉多纳

2014年世界盃外圍賽亞洲區第4圈今晚爆發，日本喺B組主場對阿曼，1.46倍「讓球主勝」值得熱捧。呢次係日本新國寶本田圭佑闊別國家隊9個月後回歸，佢仲專登轉波衫冧巴4號象徵「新生本田」誕生，而且佢同香川真司拍住正選上陣，得勝率高達80%，阿曼嘅韋根門將艾哈比斯睇怕都好難頂得住。（now670台周日晚6:30直播）
轉着4號練波勁有殺氣

亞洲區10強賽B組勁難打，日本、阿曼、約旦、伊拉克同澳洲同樣有機會爭出線，正因為咁，日本教頭沙哲朗尼決定強陣出擊，慣用嘅外流主力全部歸隊，據講佢煲完比賽錄像後，發現阿曼弱點係右後防位置，打算安排多蒙特中場香川真司同國際米蘭左閘長友佑都輪流爆破。

更重要係，莫斯科中央陸軍中場本田圭佑自去年8月後，終於獲得重召，佢話要用國際賽3連勝嚟慶祝自己回歸。為咗擺脫長期養傷黑氣，本田圭佑放棄國家隊18號冧巴，改用4號身份上陣，東瀛傳媒話佢練波勁有殺氣進入「戰鬥模式」，而且被沙哲朗尼安排出任最擅長後上前鋒，過去同香川真司齊齊正選出場合作又有8勝2和，相信佢會踢出身價波喎！
阿曼唔識攻淨識死守

對家阿曼由曾經帶領里昂橫掃法甲嘅拿古恩領軍，門將艾哈比斯又係韋根必然正選，可惜佢哋得個守字，第3圈分組賽6戰竟然得3個入球，作客埼玉肯定捱打博唔過。

亞洲區世盃外B組
世盃亞洲區10強賽

A組：卡塔爾、南韓、烏茲別克、伊朗、黎巴嫩

B組：日本、約旦、伊拉克、阿曼、澳洲
亞洲區賽制：

亞洲區目前為第4圈賽事，共10隊角逐4個直接出線決賽周席位。10隊分2組，採取主客雙循環賽制，勝3分，和1分 ，負0分，每組首2名直接出線，2支小組第3名進行主客兩回合制附加賽，勝出一方將與大洋洲區冠軍爭出線席位。