國足1.77倍「W」抵玩

猪拉多纳

造訪世界「一哥」西班牙都只輸1粒，國足嘅表現可以用驚喜嚟形容，「甘家軍」今晚乘勇出擊，喺武漢體育中心同越南拍跳，賽前主帥甘馬曹做足功課喪刨對手DVD，照計可以繼續食住越南，1.77倍「讓球主勝」捧得過。（開賽時間：周五晚7:00）

國足同西班牙踢完友賽之後，由塞維利亞啟程返歸，足足轉咗4次機、用咗接近一日先喺禮拜二抵達武漢，落機之後個個都攰爆，不過睇見專程嚟機場接機嘅球迷，一班國腳幾攰都冇所謂啦！
越南新帥未摸熟隊波

魯能三子蒿俊閔、鄭錚同耿曉鋒由於要幫球隊踢中超補賽，日前已經退隊，甘馬曹話費事班國腳咁攰，今晚極可能會派部分副選兵落場，一眾副選兵為爭表現取悅主帥，今鋪點會揸流攤吖？仲有，甘馬曹已經搭通天地線，搵咗間歐洲情報公司買料，自己出錢買咗隻越南近期賽事嘅DVD喪刨分析戰術，據講都要成500歐元，睇得出佢老人家幾咁認真。

對家越南家陣由彭太雄擔任看守領隊，佢同足總簽咗4個月約，成為16年嚟首位執教國家隊嘅本土教頭，不過對住國足想省靚招牌唔容易，畢竟越南由齊腳集訓到今日只係得兩個禮拜左右，足總賽前都講到明冇預過會贏，信心似乎麻麻。又難怪嘅，越南對上6次造訪國足全部輸晒，新帥又未摸熟隊波，今戰真係唔多樂觀。