馬主及時鬧醒合利高

猪拉多纳

伍碧權馬房今季成績出色，唔少難贏嘅馬喺佢手上一樣有頭馬見面，尋日Peter哥又有佳作，頭場隻三零部隊「合利高」，突如其來大勝近五個馬位開齋，時間1分09秒24仲破埋班際紀錄，認真唔講得笑。
       
合利高彈甩對手一條街，成為伍碧權今季最冷W。
500萬身價17分開齋

「合利高」當年在香港國際馬匹拍賣會成交價高達五百萬，點知因為閘前脾氣所累，一直都交唔到成績，好在依家喺17分淘汰邊緣卒之反彈，順利逃出生天。
       
伍碧權（右）

馬主之一蔡太蔡方漢美賽後話隻馬評分落咗好多，再唔交表現就要硬性退役，所以賽前入倉探班特別鬧醒「合利高」，話佢知再唔贏下季就無得跑，估唔到隻馬真係咁有靈性，發力贏條街返嚟。