羅比堅尼謝拉域 浪人殺手甘當配角

猪拉多纳

兩個浪人殺手，愛爾蘭嘅羅比堅尼同克羅地亞嘅謝拉域，職業生涯轉會無數，只係無論去到邊，都依然入球停不了。2人事業發展軌迹相近，今晚卻狹路相逢，無論係為咗搵自己下一個落腳點，定係為祖國爭勝，佢哋都話明願意作出犧牲，捨棄自己最強嘅入球本領，唔做英雄冇所謂，攞3分最實際。

可能係安歷卡以外，現役轉會次數最多球員之一嘅羅比堅尼，連同2度投效熱刺同外借計算，呢位洛杉磯銀河射手自17歲喺狼隊出道，至今已作出10次轉會，並為10支球隊効力。無論係喺英超、意甲、蘇超、英冠定美職，呢位「機關槍殺手」火力從來都未有減退，以佢目前依然係31歲當打之年，話唔定經過今屆歐國盃又有新去向。
羅比堅尼打過10隊波

曾代表愛爾蘭披甲117次嘅佢，目前以53球成為國家史上神射手，只係為咗球隊能夠殺出重圍，羅比仔話要佢犧牲入波都冇問題：「從來我喺國家隊都係負責入波，但其實喺球會中，我成日要做10號仔分波角色，如果領隊想我墮後多少去配合隊友，我都冇所謂o架！」同羅比仔拍檔嘅奇雲杜里係速度型射手，相比下造波能力當然唔及經驗老到嘅羅比仔。

另邊廂嘅謝拉域，今年初由格拉斯哥流浪改投愛華頓，結果上陣13次就取得11個「士哥」，被視為除柏比斯施斯外，今季英超嘅另一最佳收購。26歲嘅佢自從17歲出道開始，至今先後為5間球會效力，由祖家克羅地亞嘅夏德，之後去過比利時、奧地利、蘇格蘭同英格蘭搵食，以佢依家嘅火熱人氣，「拖肥糖」喺歐國盃後恐怕未必留得住佢。
愛華頓難留謝拉域

謝拉域以往喺國家隊一直發揮平平，至今19次為國家隊上陣僅入2球，不過主帥比歷就撐到佢出晒面，特別係當正選前鋒奧歷已經因傷退隊，嚟緊「格仔兵團」入波都靠晒佢。比歷話：「佢對住曼聯嘅3個世界級守衞都入到2球，對住格魯吉亞冇波入，只係因對手擺8個人守喺禁區，唔關佢事。」反而謝拉域則睇得更輕鬆：「我知大家都期望我入波，但冇理由要球隊遷就我去改變踢法，實際上最緊要係隊波踢得好，我唔會有壓力，我會全力配合國家隊。」
「克」星火炮－謝拉域

國籍：克羅地亞

出生日期：1985年8月27日（26歲）

身高：1米87

効力球會：愛華頓（英格蘭）

曾効力球會：維也納迅速（奧地利）、

夏德（克羅地亞）、

華雷根（比利時）、

格拉斯哥流浪（蘇格蘭）

國家隊上陣次數/入球：19場/2球