今屆要做俄羅斯fans

猪拉多纳

呢幾日聽到好多《撳快錢》同事們都crossover玩過界，參與歐國盃嘅相關工作，又見到體育組成班同事上上落落，個個都好忙碌，但又好似都忙得好開心咁，令公司上下都充滿大賽氣氛！

雖然我至愛嘅運動係美式桌球，英式足球就唔係成日睇，但係我都覺得畀歐國盃熱浪圍繞。同事們休息都會講吓波經，我就多口問句嚟緊邊隊對邊隊，佢哋話聽日凌晨零時會打法國對英格蘭，問我有咩心水，我話其實我唔睇波o架，不過如果兩隊要我揀，我就揀英格蘭，話晒我都係英屬哥倫比亞大學畢業o架嘛，佢哋聽到話咗我一句「無聊」就行開咗。
「上過身」梗要撐

跟住隔籬仲有個同事問，成個賽事十六隊你睇好邊隊？我第一時間就話俄羅斯！同事就好奇咁講：「原來Scarlett都幾識貨喎！俄羅斯第一場就大勝對手四比一！」我笑笑口就行開咗，其實我揀俄羅斯嘅原因只得一個，早前同《東方日報》影咗一輯歐國盃相，我就係着咗俄羅斯件波衫影相，咁咪貼俄羅斯囉！

好！從今日開始多啲留意英格蘭同俄羅斯先，唔係下次講波無話題呀！哈哈，話唔定我由今屆歐國盃開始成為球迷呢！