「牙齒印」深 警力升級

猪拉多纳

波蘭與俄羅斯近年都有幾多「牙齒印」，最主要原因係兩年前，前波蘭總統萊赫‧卡欽斯基於俄羅斯遇上空難身亡，有部分波蘭人認為係人為事故，對俄羅斯仇恨進一步加深。據悉今場波蘭對俄羅斯前，當地警方已提升警戒級別，除球場內外有大批警察駐守外，市內重要地段及交通樞紐都會派出便衣警員及巡警作長時間監察，以免爆發流血事件影響到賽事進行。
激進組織擬掟臭蛋

另外早前有報道指出，有波蘭激進組織正計劃到俄羅斯所入住嘅酒店門外等候，一見到俄羅斯大巴出發就以臭雞蛋及穢物「侍候」。波蘭政府已呼籲人民保持冷靜及克制，無謂影響波蘭形象。

不過波蘭人就算肯乖乖哋睇波，保安工作都唔能夠有半點鬆懈。基於歐洲國家盃開波以來，俄羅斯球迷已曾多次搗亂及爆發大規模打鬥事件，就連歐洲足協揸弗人柏天尼都話極度關注。

對於歌手李蘊（Renee）嚟講，今晚真係好難揀！皆因有睇第一輪比賽嘅佢，覺得俄羅斯好勁，但又好欣賞主場嘅波蘭，所以決定兩件波衫都着晒上身，實行兩隊都撐！