丹麥下盤冇黐牙

猪拉多纳

歐洲國家盃Ｂ組第二輪比賽，頭場丹麥對葡萄牙。首輪比賽，丹麥以一比○擊敗強隊荷蘭，除咗攞到勝利三分外，更展現出強大團結力量。丹麥名氣不及同組其餘三支球隊，所以經常被人輕視，當正係出局熱門。查實丹麥踢法實而不華，相比起葡萄牙嘅花拳繡腿更見實際。葡萄牙攻力不足，今讓平半唔抵玩，下盤值得優先考慮。（now 632及660周四凌晨零時直播）

葡萄牙人腳質素的確唔差，淨係一個Ｃ朗都已經惡氣十足。不過足球競技並唔係單靠一人之力，任由Ｃ朗天大本領都要靠隊友輔助先至可以換得成功。而喺團隊合作性方面，丹麥就優勝得多。全場十一個球員分工明顯，依從領隊吩咐緊守崗位，搞到攻力強勁嘅荷蘭都咬佢唔入。今仗面對葡萄牙，丹麥一樣可以發揮出團隊力量抗衡人腳質素較高嘅葡萄牙。
首仗浪費機會有辦睇

觀乎葡萄牙首場對德國，葡軍確實製造唔少入球機會，衰在前場欠缺一個機會主義者，冇法將機會轉化為入球。留意到當日Ｃ朗好努力，希望以個人之力彌補陣容上嘅缺陷，無奈努力換唔到相等回報，最終都係失晒三分。某程度上巨高係戥Ｃ朗可憐，多年來都無法為國家隊帶來突破，仲要畀球迷話佢大細超，喺皇馬就搏到盡，喺國家隊就勒住踢。

老實講，喺外圍賽都唔覺得葡萄牙有霸氣，今場要贏波有難度，況且葡萄牙心理包袱比丹麥沉重得多，要讓波一定捧下盤。

鑑於丹麥並非主攻性球隊，未必可與葡萄牙產生太多角球，全場應唔會超出10個。至焦點人物基斯坦奴朗拿度，若今場對丹麥未能有「霎醒」演出的話，隨時會被換出，有17倍值得嘗試。