溫哥華追打殘陣紅牛

猪拉多纳

美職今季賽程安排終於與時並進，早前世界盃外圍賽進行期間，只係安排咗零星嘅補賽，免得球會同國家隊爭人用，等大家刨波嗰陣唔使咁煩，但由於今季美職多咗一隊角逐，大家都多咗常規賽要應付，稍後各隊亦忙於接待歐洲勁旅踢表演賽，所以今個周中趁空檔即刻啟動快車，等呢個歐國盃休息日唔使咁dry。

聽朝6場美職賽事，重心係主場出擊嘅溫哥華白帽，佢哋嘅對手紐約紅牛上仗預先張揚，話射手亨利同守將馬基斯都因傷休息兩仗，結果剛戰作客實力唔強嘅芝加哥火燄都要輸1:3，證明呢兩名主力缺陣對紅牛影響極大，今戰造訪近7次主場不敗嘅溫哥華，受讓平半都咪制。（開賽時間：周四早上11:00）
多倫多輸到慌博侯斯頓

另一隊近期當黑嘅肯定係FC多倫多，雖然佢哋上個月又贏得加拿大錦標賽，連續4年奪魁，來年又可以出戰中北美洲冠軍盃，但今季美職戰績就慘不忍睹，11場聯賽輸足10場，雖然依家可以專心應付番聯賽，理應可以踢番應有水準，可惜喺星期一朝早又有麻煩事發生，中場蘇斯馬、路爾斯施華及後衞米基爾艾斯華因喺夜店生事被捕，雖然3人已經獲准保釋可以落場，不過對多倫多嚟講始終係雪上加霜，今仗對手侯斯頓戴拿模近4次聯賽有3場射入2球，有足夠火力喺主場開出2.3倍「讓球主勝」。（開賽時間：周四早上9:00）
足球重心：

溫哥華白帽（上盤）、侯斯頓戴拿模（讓球主勝）
馬膽推介：4場(2)開心至愛

早前於谷草一哩以超快時間贏馬，當時已經覺得可以扶搖直上，可惜之後卻次次排外檔，但仍然所負不遠，今仗難得抽番好檔，肯定係配合方嘉柏馬房攻勢而來。