香川打正選曼聯做「大」騷

猪拉多纳

「紅魔」季前熱身賽第2擊今晚喺南非上演，由阿積士開普敦主場對曼聯，不妨玩入球大。曼聯上場僅以1:0砌低阿馬祖路，但費爵爺講明呢場會派新加盟嘅香川真司打正選，為免季初坐冷板，相信佢會整場入球騷氹費Sir開心！（now640台周六晚9:00直播）

講真，香川係咪夠料喺曼聯長期打正選，暫時我真係唔敢講，但日本球員出名鬥志旺盛，無論本田圭佑最初加盟芬洛，抑或長友佑都轉投國米，好快已經有令人意想不到嘅表現，爭取到正選出場機會，而且熱身賽通常踢得冇咁兇狠，上季「極品壽司」為多蒙特連盃賽入13球、交出11次助攻，今晚肯定大把世界！
阿積士開普敦攻強守弱

日前對阿馬祖路，香川因為場波遲遲冇死球出現，結果計埋加時至踢得4分鐘，肯定唔夠喉，而上場曼聯安排路爾斯華倫西亞同路爾斯安達臣打後備，正路呢場佢哋會做正選，加埋要騷哥利博轉會嘅貝碧托夫，相信曼聯絕對唔會食白果咁失威，1.54倍入球大熱都抵博！

阿積士開普敦係荷蘭班霸阿積士衞星球隊，上季得聯賽第9名，踢30場入42球、失49球同樣係攻強守弱，當中入42球，火力仲勁過冠軍嘅奧蘭多海盜，新加盟嘅格羅寧根射手雲迪歷克，應該幫到手，始終曼聯嘅歐國盃球員未歸隊，兼有大批球員因傷冇隨隊，防線4缺3得里奧費迪南獨撐，唔似可續保清白。