日本士氣爆燈玩殘埃及

猪拉多纳

倫奧男足8強大戰今晚爆發，日本男奧足硬撼埃及，捧1.9倍主勝。日本家陣士氣勁爆，轉移陣地到曼徹斯特後，更獲香川真司探班請食東瀛大餐，要贏埃及應該唔難。（有線18、63及203周六晚7:00直播）
埃及超齡孖寶或離隊

一向崇尚喪攻嘅關塚隆，竟然教到日本男奧足3場不失球，首名出線入8強。其實日本中後場球員質素唔高，只係除咗龍門，其餘件件都瘋狂搶截，西班牙都要死喺佢哋手上，就知「關塚日本」得人驚。雖然大津祐樹上場踢到抽筋，但去戰日本對洪都拉斯，３件前場主力永井謙祐、東慶悟同清武弘嗣只係後備上陣，大把貨賣，最重要係大軍去到曼徹斯特，竟獲香川真司帶路去日本餐廳開餐，有「大佬輩」打氣，日本小將肯定更搏。

埃及就閉翳咯，佢哋同艾阿里有協議，分組賽後要放走「超齡」前鋒莫塔同中場阿布捷卡踢非冠盃，要知阿布捷卡係埃及隊長，截稿前未知教練可唔可以說服艾阿里畀孖寶留低，但肯定嘅係，佢哋備戰一定亂晒坑，惡唔出樣。