「美女」攻守屈機「大」炒格

猪拉多纳

奧運女足嚟到4強戰上演中北美洲區內訌，由加拿大女足迎戰冠軍大熱美國女足！「美女」憑住無人能擋嘅鋒力，加上無人能破嘅防線，絕對有力喺法定時間內輕取加拿大殺入決賽，2.25倍「讓球客勝」捧得過o架！

（有線18、63及203台周二凌晨2:45直播）
加拿大單天難保至尊

美國女足無驚無險殺到入4強，小妹就超睇好佢哋可以贏埋加拿大入決賽喇！一班「美女」上場繼續靠無敵嘅進攻組合雅歷絲摩根同雲芭芝「屈機」，一個傳一個射都唔知配合得幾咁美妙，仲造就「雲姐姐」連續4場都有波入添！

最緊要係，「美女」條防線夠晒穩定，除咗喺分組賽對法國時大意失2球外，就再冇失過波，難怪領隊皮婭都大讚守將保娜同拉姆邦妮，配合埋上場表現出眾嘅後備殺手拉洛絲，要喺90分鐘內分勝負，絕對冇問題。雖然加拿大都有同雲芭芝一樣攻入4球嘅射手坦絲列蒂，但係踢波講整體，對住三線實力均較高嘅美國，睇怕都會4強止步喇！