PSG打「羅」響頭炮

猪拉多纳

伊巴謙莫域、拿維斯同堤亞高施華3位世界級球星，出年1月仲有件盧卡斯洛迪古斯來投，齋睇巴黎聖日耳門（PSG）個陣都標冷汗。呢支富豪球隊今晚喺法甲首戰主場迎戰羅連安特，1.8倍「讓球主勝」抵博！（now714台周日凌晨3:00直播）
羅連安特齋買老將古利

自從1994年之後未染指過法甲冠軍嘅PSG，上季鍊唔贏蒙彼利埃確係丟架，主帥安察洛堤講到明今季要稱霸聯賽之餘，仲要喺歐聯攞好成績，季前熱身賽和過車仔同巴塞，攻、守表現都獲傳媒一致讚賞。

雖然聖保羅新星盧卡斯洛迪古斯明年初先報到，堤亞高施華就仲幫緊巴西踢緊奧運，不過呢班波本身已經有利尼、柏斯托尼同莫達等超班球星，加埋伊巴謙莫域同拿維斯兩位頂級鋒將，要炒起羅連安特綽綽有餘啦！何況羅連安特今季嘅重點收購，只係自由身加盟嘅36歲法國老將古利，上季作客成績更只係倒數尾2，今鋪輸少球都偷笑。