多蒙特搶韁 盛氣凌仁

猪拉多纳

新一季德甲聯賽兩周後先至開鑼，不過德甲兩支最強球隊拜仁慕尼黑同 今晚會喺德國超級盃率先交鋒，比賽安排喺拜仁慕尼黑嘅安聯球場上演，法定時間90分鐘賽和將不設加時，即以互射十二碼分勝負。拜仁季前準備工作唔及多蒙特完整，加上傷兵滿營，即使主場都讓唔起波，多蒙特有近5次交手全勝佳績支持，黑柴推介「讓球客勝」。

（有線18及63台周一凌晨2時直播）

連續兩季失落聯賽錦標嘅拜仁，今季季前痛定思痛，動用三千萬歐元擴軍，引入史達基、丹迪、梳頓沙基利、比沙路同文迪蘇傑等具實力球員，不過整體上都係補充兵源，呢批球員暫時嘅實力唔算比原有球員強，當中文迪蘇傑同丹迪都會喺今晚正選上陣。
拜仁傷兵滿營

喺早前結束嘅歐洲國家盃，拜仁共有13名球員參戰，係全歐洲最多人為國效命嘅球會，預期所受嘅後遺症會較嚴重，多名球員遲歸隊令季前備戰工作欠完整，加上傷兵滿營，首席射手馬里奧高美斯同左閘阿拉巴啱啱做完手術要長抖，另一左閘迪亞高干坦圖、右閘拿菲爾同副隊長舒韋恩史迪加今仗都因傷缺陣，新加盟嘅射手比沙路亦只係啱啱傷愈，陣容不整下，教練軒歷基斯今仗會起用由二隊提升嘅18歲小將簡恩擔任正選左閘，面對實力強橫嘅多蒙特面臨考驗。
高普揚言六殺對手

多蒙特今夏有香川真司同巴里奧斯離隊，但補入上季德甲最佳球員馬高列奧斯、史特加本土射手舒希巴同科特布斯18歲天才貝頓確特，實力未見削弱，佢哋季前準備時間較充裕，陣中只有施雲賓達同基爾兩名傷兵，加上近五次對壘都喺90分鐘內擊敗拜仁，難怪教練高普信心十足，揚言即使作客亦可以「六殺」德甲巨人，受讓值博。