卡比路迪甘斯今晚考牌

猪拉多纳

今晚上演多場國際熱身賽，焦點必定係兩位名帥卡比路同迪甘斯新官上任，到底有冇火。意大利「金牌教頭」卡比路失意英倫，轉戰俄羅斯，勢必使出渾身解數，力求東山再起，省番靚個金漆招牌。至於球員時代助法國連奪世界盃及歐國盃冠軍嘅迪甘斯，以領隊身份回歸，破舊立新，棄用一班麻煩友，提拔新面孔，掀起新一場法國大革命。
俄羅斯夠殺科特迪瓦

俄羅斯經濟起飛，國家隊06年開始聘請外籍名帥領軍，先係希丁克，跟住有艾禾卡特，依家又搵來鼎鼎大名嘅卡比路執教。目標就係要令俄軍進身一線勁旅行列，與該國國力匹配，迎接主辦2018年世界盃，絕對唔可以失禮。卡比路身負「政治任務」，首仗主場迎戰科特迪瓦，必求響頭炮，主勝1.85倍抵玩。

（中央5台周三晚11時開賽）
鐵腕啱使強陣迎敵

卡比路以往執教球會捧盃無數，但教英格蘭戰績未如理想，被質疑魔法不再。不過英軍長年積弱，罪不在卡帥，而且英格蘭球星玩慣歎慣，同卡比路鐵腕管治，明顯格格不入，「分手」屬正常。俄羅斯傳統上踢法機動，球員有紀律，啱晒卡比路胃口，相信可以一拍即合。

事實上，俄羅斯近年國際賽表現唔差，今夏歐國盃分組賽出局，好大程度上因為最後一仗對希臘衰大意。卡比路出名謹慎，戰術高明，俄羅斯喺佢調教之下，應會有唔少進步。卡帥今次召入艾沙維、迪沙高耶夫、柏夫里約真高及舒洛哥夫等主力，強陣應戰態度認真。

科特迪瓦今次大軍名單擁有多位球星，包括杜奧巴、耶耶托尼、高路托尼、謝雲奴及迪奧迪，但冇沙洛文卡勞。不過杜奧巴千里迢迢由上海飛去莫斯科比賽，對呢位老將造成好大負擔。其他主將多數効力英超球會，英超周末開鑼，佢哋或會留有一手，唔會破壞卡比路好事。