人老波不老

猪拉多纳

各位體育迷，呢個夏天真係目不暇給，轉眼間新一季英超又開咧，球迷們又有好戲睇喇！不經不覺，Peter評述有關英超球隊嘅賽事，已經有18個年頭；人老，但波唔可以老，要追上時代就不能只緬懷過去，必定要放眼未來。新季英超長路漫漫，要預測王者言之尚早；倒不如以短短幾句，評評大家關心球隊。

去季「富豪球隊」曼城，一搔44年之癢奪得英超冠軍，係「金錢足球」一次勝利，今季佢哋能否「再坐一會」，就要睇領隊文仙尼功力。曼聯去季臨尾香，將錦標拱手相讓予死敵，費Sir今夏簽入尹佩斯同香川真司，目標只得一個，就係要將冠軍搶返嚟。

車路士老細阿布拉莫域，終於得嘗所願擸走上屆歐聯錦標，但竟然係由暫代領隊迪馬堤奧帶隊取得，再一次應驗「波係圓嘅」呢句說話。而阿仙奴自早年奪得「雙料冠軍」後，近季只着力炮製漂亮足球，連盃仔都冇隻。球迷當然唔滿意啦，但佢哋老細話有錢賺就得，針，真係冇兩頭利。
紐卡素「飢饉」30

進入英超時代後，利物浦就好似撞咗邪一樣，一次聯賽冠軍都未攞過，新帥羅渣士好難於短時間內扭轉頹勢。紅軍要問鼎英超，青訓要出多幾個「Stevie G」謝拉特先得囉！而紐卡素亦與盃無緣，基瑾當年都唔得，睇嚟佢哋會繼續食白果，不但係「飢饉」30，相信去到60都冇運行。愛華頓亦好耐冇建樹，但一日有「義耶」莫耶斯「仗義執教」，球隊都可以做攔路虎。