拉科贏卡士 葡國4借將省爆奧沙

猪拉多纳

西甲首輪賽事有「周一連續3響炮」，頭場拉科魯尼亞主場對奧沙辛拿。呢場波兩隊都冇真金白銀收購新球員，不過相對下，拉科有「C朗經理人」佐治文迪斯撐腰，借用嘅球員較有卡士，有料開1.78倍主W。（now632台周二凌晨1:00直播）

拉科得到上季西乙冠軍升班，但教練文迪尼巴爾得60場西甲執教經驗，期間得13勝16和31負，不過咁，拉科擁躉又唔使驚嘅，事關呢支西甲老牌球會得到C朗同莫連奴經理人佐治文迪斯關照，借用到賓菲加前鋒尼爾遜米基爾同後衞洛迪歷米蘭達，仲有士砵亭中場沙洛馬奧同後衞安達山度士，4件葡國借將令拉科實力大增，難怪會方話要封「佐治哥」做榮譽會員啦。
奧沙搵「免費男」戥腳

縱使37歲嘅中場大腦華拿朗、32歲前鋒里基仲係拉科必然正選，可能會令部分老一輩球迷擔心，不過對家奧沙辛拿都唔好得幾多，佢哋季前至少有4件主力離隊，但就冇錢入貨，夠求其喺自由市場簽幾件「免費男」湊腳，同埋借用喺皇家蘇斯達好似廢咗武功咁嘅射手荷西巴洛蘭迪，完全係自我放棄護級格局，咁嘅情況作客拉科，唔多似有運行。