里昂「掛牌棄將」 騷哥利求發「維」

猪拉多纳

里昂今季冇歐聯踢，焦點又落晒「億萬大軍」巴黎聖日耳門度，壓力自不然細咗，呢個亦係佢哋開季兩戰贏晒嘅主因，亦因為陣中幾位主將已經被掛牌，為謀出路當然要把握機會證明身價。今晚里昂造訪伊維恩，呢場東部打吡當然要撐2倍客勝。（開賽時間：周六凌晨2:45）
哥古夫傷韌帶抖3個月

里昂備受財政問題困擾，最近積極喺轉會市場兜售球員，其中上仗有波入嘅巴菲迪比高美斯同米高巴斯圖斯都榜上有名，既然離隊都成定局，當然要趁機會「騷哥利」博入豪門啦！

上仗鬥特魯瓦一戰膝部韌帶受創嘅中場哥古夫，賽後證實要抖3個月咁耐，不過教練加迪就話一啲都唔擔心，似乎對砌低伊維恩胸有成竹喎！

查實又難怪佢老人家咁老定嘅，畢竟伊維恩開咧兩戰都輸波，上場鬥比斯特明明佔盡優勢，可惜以基利法為首嘅鋒線浪費咗勁多「餐士」，把握力差到爆。仲有呀，前鋒恩歷克沙保一路話想走，點知會方又勒令佢要踢到2014年約滿為止，陣營氣氛真係麻麻，有地利都唔慌有運行。