伊巴謙 堤亞高施華復出 撐PSG贏「波」

猪拉多纳

巴黎聖日耳門今晚喺法甲主場對波爾多，兩大貴價貨伊巴謙莫域同堤亞高施華預計同時復出，加上開咧兩場未開齋，呢啖氣又點吞得落？就當支持PSG教頭安察洛堤要搏盡保飯碗，1.46倍主W熱都照捧！（開賽時間：周一凌晨3:00）

今季繼續瘋狂掃貨，成為歐洲球壇大豪客嘅聖日耳門，開季連續兩場聯賽和波，而且對手只係羅連安特同阿些斯奧，演出似乎唔多對辦。不過都咪忽略一點，伊巴謙莫域首場熱身賽登場對華盛頓聯隊已經入波，首次踢法甲又梅開二度拯救PSG，呢場佢孖住堤亞高施華復出，一前一後可以喺法甲打橫行，有佢哋幫手唔怕會再失分。
波爾多缺中後場主力

雖然聖日耳門有新簽射手拿維斯停賽，好在對手波爾多傷兵都唔少，其中嘅中場柏拉斯同後衞軒歷基都係主力成員，論牌面始終唔能夠同聖日耳門相比。再講，上季聖日耳門失落聯賽錦標，今季出閘又脫腳，隨時令教練安察洛堤飯碗不保，話晒伊巴謙莫域同堤亞高施華過檔係為咗跟佢搵食，斷估佢哋都會搏盡撐住安帥啩？今晚主場出擊，3分應該冇走雞啦！