孖堡戰禾夫追打黑仔王

猪拉多纳

今晚德甲獨腳戲有奧格斯堡主場迎戰禾夫斯堡，呢場雙「堡」之戰，小妹就睇高客軍一線！皆因主隊唔止開咧連輸兩場，仲相當唔好彩咁有多位主力受傷，平手梗係撐禾夫斯堡！

（有線64及204、廣東體育周六凌晨2:30直播）
奧格斯堡開季傷幾件

奧格斯堡可謂德甲開季嘅黑仔王，先係喺主場輸兩球畀升班球隊杜塞爾多夫，之後作客史浩克04，輸就預咗㗎啦，點知後衞施巴斯坦蘭甘同倒戈中場具滋哲齊齊受傷，傷嘅部位仲要係腳踭韌帶，據軍醫所講，起碼都要抖番兩個月先出得！連唯一靠得住嘅門將費斯，都啱啱做完手術要休養4個星期，奧格斯堡嘅開季路注定難行。

其實禾夫斯堡表現亦唔算好理想，上場居然喺主場淨吞漢諾威4蛋，但佢哋始終有上季外借馬體會後大放異彩嘅迪亞高坐鎮中場，佢同教練馬加夫冰釋前嫌後，今季相信會續有好表現，更重要係前仗入波嘅巴斯杜斯應該趕得切復出，有力喺奧格斯堡傷口上灑鹽！