歐聯周中開打好睇過戲

猪拉多纳

歐聯分組賽事將於周中展開，Peter率先為大家展望各組形勢。每屆抽籤結果，難免有人快活有人愁，可謂時也命也。今屆焦點之一自然係「死亡之組」D組，有皇家馬德里、曼城、多蒙特及阿積士，四隊名氣及實力都係享負盛名，真係好睇過戲。
薩克達奇兵一路

其他組方面，A組四隊實力平均，最多都係財大氣粗、球星如雲嘅巴黎聖日耳門可以稍為秤先。不過金錢唔係萬能，始終要臨場比賽先至有分曉。B組有深受唔少香港球迷歡迎嘅阿仙奴，另外三隊唔算強，但以兵工廠今季演出，難免令人擔憂，呢組可謂像霧也像花。

C組AC米蘭已成褪色勁旅，但好彩抽到好籤，大家拭目以待睇下「紅黑兵團」爛船仲有冇三斤釘。E組車路士及祖雲達斯屬於出線大熱，如果有爆冷嘅話，薩克達可望突圍。F組同G組唔使多講，拜仁慕尼黑同巴塞隆拿一枝獨秀，其他球隊只能爭次名出線。H組費格遜吸取上屆教訓之後，應該唔會重蹈覆轍，曼聯喺呢組出線機會高唱入雲。

今屆歐聯Peter有幸可以喺兩個平台同大家分享同研究賽事，分別係東方日報波經嘅「歐聯不夜天」，以及有線嘅賽前雜誌節目「歐聯熱話」，到時再同各位傾，大家記得收睇同收聽。
是日金句：

歐聯未打到中秋 有人快活有人愁