法比安奴 尼馬粒粒星

猪拉多纳

萬眾期待嘅「美洲超級經典對決」，聽朝先演首回合大戰，由巴西喺戈亞尼亞市主場迎戰阿根廷。雖然大家都係老牌足球強國，實力旗鼓相當，但睇番今次雙方點兵，「森巴兵團」重召埋前洲際國家盃神射手路爾斯法比安奴歸隊，火力強勁，絕對唔難射爆阿根廷，1.4倍主勝抵捧！（開賽時間：周四早上9:00）

美洲超級經典對決規定雙方只可以徵召喺南美洲搵食嘅球員，雖然巴西唔可以揀諸如侯克同柏圖等外流歐洲嘅星級國腳入伍，但睇番佢哋領隊文奴文尼斯今次嘅21人名單，前線就有路爾斯法比安奴、尼馬同李安度達美奧等，成個陣容依然星光熠熠，實力強勁。
諗定入波學保特慶祝

事實上，路爾斯法比安奴都話明今次要踢身價波，證明自己力足入選2014年世界盃大軍，佢仲話今場如果取得「士哥」，就會用佢偶像百米飛人保特嘅招牌姿勢做慶祝，鬥志肯定有保證。

阿根廷呢邊，真正夠級數諸如美斯、阿古路等，統統冇資格喺今次賽事披甲，主帥沙貝拉揀咗21人出征，但真正具名氣就只得前利物浦快翼麥斯洛迪古斯，中前場甚至起用兩個90後新人阿祖辛杜利安同梅治尼支撐，憑乜同巴西砌呀？