賓約哥入晒局靠「德」住

猪拉多纳

近年日本潛質新星一窩蜂外流，加上去年大地震後未能吸引實力外援加盟，連累日職球隊喺亞冠盃16強全數出局，搞到水準甚低嘅澳職代表阿德萊德聯都入到8強，今晚佢哋喺首回合主場都幾難搞掂烏茲別克班霸賓約哥，主隊讓平半撐下盤。（now670台周三晚6:00直播）
阿德萊德聯久疏戰陣

阿德萊德聯得以喺亞冠盃分組賽出線，皆因當時已經緣盡澳職季後賽，可以一心一意應付亞洲戰線，況且當時正值聯賽後段，狀態點都好過當時開咧冇耐嘅日、韓球隊。

不過去到9月，情況就完全調轉晒，事關澳職仲未開咧，阿德萊德聯踢幾多場熱身賽都好，始終都係未入局，相反對手賓約哥已經踢咗19場本土聯賽，亦只係輸過兩場咁多，入晒局有望報回今屆分組賽一敗之仇。
亞冠盃賽制

採主客兩回合淘汰制，今輪為8強首回合，若總比數相同，作客入球較多一隊晉級，再和則於次回合後加時作賽。若加時入球數字相同，客隊將憑作客入球優惠晉級，若加時沒有入球，則需互射12碼決勝。