漢諾威賀漢堡125歲大壽

猪拉多纳

今日係Oliver出生地漢堡市嘅大日子，係球會創會125周年正日，漢堡喺德甲主場北部打吡戰迎戰漢諾威，當然決心搶攻，考慮到雙方都攻強守弱，今晚會合演入球騷娛賓，1.62倍入球大係投X首選。

（周六晚9時30分開賽）

漢堡市政府準備咗大型慶典，安排喺今仗比賽場地北方銀行球場鄰近嘅運動場舉行，慶典會全國直播，只待漢堡對漢諾威比賽完結後就開始，漢堡係慶典主角，又點肯令全市人民掃興？今仗爭勝決心可想而知。
雲達華治伉儷媲美碧咸

漢堡近況冒升，先擊敗衞冕多蒙特，繼而作客幾乎贏埋慕遜加柏，首席功臣當然係回巢嘅雲達華治，上仗射入世界波令人嘆為觀止。大家可能會問，以佢嘅級數，點解肯由英超勁旅熱刺返嚟德甲下游球隊効力，仲要收少接近一倍人工？原因除咗佢喺漢堡地位崇高，已經係球迷心目中英雄外，太太施維亞喺德國尤其漢堡市相當吃香，有大量電視台同時裝模特兒工作等住佢，佢兩個喺漢堡嘅地位，就等同碧咸同維多利亞一樣，大家唔使擔心佢唔盡力踢。

漢堡近期表現出色，上仗唔贏慕遜加柏相當唔抵，球隊前線組合已經係近季最強，不過防線就真係眼冤，經常不明不白咁失波，今晚急於搶攻，遇上疲兵漢諾威贏面雖然較高，但對手鋒線亦人才濟濟，而且擅於反擊，相信漢堡難保持清白之身，Oliver覺得入球大更加可靠。