維拉翻生征西有計

猪拉多纳

今晚英超爆發「中部打吡」，阿士東維拉主場鬥西布朗。維拉狀態明顯回勇，剛於英聯盃淘汰王者曼城，而艾邦拉荷、戴倫賓特兩大主力明顯上力；西布朗後防傷兵多有隱憂，維拉力足報番上季主場輸波之辱，平手盤撐主隊。

（有線300及200台周日晚11時直播）

本季伯明翰同狼隊跌落英冠，中部球隊剩番阿士東維拉同西布朗，兩軍一向撈亂骨頭，今次打吡戰分外惹人關注，雙方球迷都視聯賽兩循環對撼係全季最重要兩場比賽。維拉開季演出一般，領隊林拔頗受壓力，但自從主力射手搵番埋門觸覺後，球隊再非冇牙老虎；上場艾邦拉荷就梅開二度，成為淘汰曼城頭號功臣。另外澳洲翼鋒比列賀文傷愈復出，亦加強了側擊能力。
西布朗殘陣好頭痕

西布朗今仗續有奧丹維治停賽，此子把握力極強，殺傷力比盧卡古及沙恩朗強大，佢坐波監對攻力必有影響。但最大鑊係列治維、哥蘭波波夫同史提芬列特三名後防齊齊受傷，令防守力大大降低，今場「讓球」開平手盤，必捧阿士東維拉。