「細」紀悶戰冇懸念

猪拉多纳

英超獨腳戲上演倫敦打吡戰，昆士柏流浪主場對韋斯咸，兩隊攻力都咁弱，昆士柏流浪屬聯賽唯一一隊主場零士哥球隊，進攻冇組織欠板斧，一味靠森莫亞去硬闖。而咁啱韋斯咸就係英超唯一作客冇入波大軍，缺少中鋒安祖卡路爾後前線把握力弱，正一係海軍鬥水兵，估計係悶波一場，捧細係不二之選。

（有線300及200台周二凌晨3時直播）
卡頓高爾射術曳

昆士柏流浪季前瘋狂增兵，但踢落雷聲大、雨點小，聯賽主場兩戰不勝，連一球都入唔到，佢哋前線靠晒射手森莫亞，呢個大舊佬喺聯賽包辦球隊3個入波，發揮唔曳，但亦反映其他進攻球員做唔到嘢，法國箭頭施斯近況一般，另一箭頭安祖莊臣受傷長抖，大軍進攻點不足，對手自然易於防守。

韋斯咸情況唔好得幾多，自從利物浦借將安祖卡路爾養傷後，主帥艾拿戴斯被迫起用長期缺態嘅卡頓高爾單獨攻堅，但呢個高佬射術甚曳，另一進攻球員華斯迪亦經常浪費機會，只能靠中場重心路蘭爭取士哥。「錘仔幫」聯賽作客兩戰僅得1分，對住史雲斯淨吞3蛋，遇上諾域治互交白卷，客場鋒力疲弱，欠缺士哥本錢。
施薩索拉斯鎮得住

昆士柏流浪後防傷兵多，缺少左閘法比奧達施華、阿曼特查奧爾、右閘保辛華同中堅安頓費迪南等，但老將賴恩尼爾遜喺中路夠硬淨，前國際米蘭巴西門神施薩索拉斯狀態奇佳，論防守力一啲都唔失禮㗎！

「錘仔幫」最近6次作客QPR皆不勝，當中5場冇入球，不過大部分已經係90年代嘅舊績，參考價值不大，但以佢哋現時情況嚟睇，今場大有機會開出細盤。