FC廣州大德起

猪拉多纳

亞冠盃八強次回合賽事，中超富豪球會ＦＣ廣州（廣州恒大）主場對沙特阿拉伯勁旅伊蒂哈德，廣州首回合落後2比4，今場將會派出南美三叉戟孔卡、基奧同巴里奧斯強攻對手，全力收復失地。不過，伊蒂哈德超級射手夏沙斯威脅力強，廣州未可安枕，預期兩隊會再上演入球騷，捧大！

（now 671周二晚8時直播）

ＦＣ廣州首回合作客伊蒂哈德受壓，防線發揮欠穩，足足失咗四球，搞到形勢不妙，現時已無退路，只能盡量爭取入球平反敗局。廣州進攻主力穆里奇有傷在身，未必可以落場，但大軍仍然星光熠熠，前線有前多蒙特射手巴里奧斯在陣，將會拍住高大中鋒基奧，後面又有星級中場孔卡幫手。人就擺晒喺度喇，消息指教頭納比會改打三五二，盡地一煲搏殺。
伊蒂哈德有卡士

不過，伊蒂哈德絕非善類，大軍亦有唔少猛將，當中以沙特射手夏沙斯最犀利，首回合梅開二度搶晒鏡，盛傳廣州想出價1,000萬歐元撬走呢位球星，夏沙斯亦話若果對方開出吸引人工會考慮，今次佢肯定會繼續騷哥利。此外，伊蒂哈德仲有前馬賽中場麥巴美及巴西球星迪亞高蘇沙等，攻守同樣有料到，今次有本錢繼續同廣州鬥入波，玩入球大最穩陣。
賽制：

採主客兩回合制，今輪為8強次回合。兩回合計打和將計作客入球優惠，未分勝負則於次回合法定時間後加時30分鐘，加時仍計作客入球優惠，再和則以互射12碼決勝。