克魯底厚「+1」梳財

猪拉多纳

由英甲、英乙球隊角逐嘅英格蘭聯賽錦標，第二圈分成南、北賽區，每區各有十六隊，重心場次揀咗場英甲內訌，梳士貝利主場對克魯，克魯主力尼克包維同艾殊利韋斯活特今夏雙雙離隊，球會賺到盆滿缽滿，但新季踢落仍然唔曳，梳士貝利態沉攻力弱，讓唔起對手，要「讓球客勝」！（周三凌晨2時15分開賽）

克魯新季殺上英甲，未擴軍先遭挖角，新星尼克包維轉投曼聯，另一主力艾殊利韋斯活特就去咗阿士東維拉，會方加埋淨袋超過800萬鎊轉會費，真係有排搣。克魯簽番唔少新兵，其中射手馬特斯波格巴係祖雲達斯中場保羅普巴阿哥，佢雖然冇細佬咁叻，但暫時都喺聯賽入咗兩粒，算係咁啦！此外克魯仲借埋阿仙奴小將祖克斯安歷基，班底唔差，想爭升班就難啲，但相信可保英甲席位。
梳士貝利死火讓唔起

另一邊廂梳士貝利人腳一般，前面靠馬雲摩根爭取士哥，但呢位哥仔近期忘帶射門鞋，搞到大軍連續三場交白卷，鋒力咁弱，點讓波呀？翻查往績，梳士貝利近年於英格蘭聯賽錦標戰績麻麻，對上三屆都過唔到次圈，上屆仲首圈畢業，某程度反映幕後人唔吼呢隻盃仔，佢哋近況唔好，就算主場出戰亦冇優勢，一於反梳士貝利啦！