名帥鬥球王俄軍誓剝「牙」

猪拉多纳

世界盃外圍賽戰火重燃，今輪另一焦點必定係歐洲區F組，俄羅斯主場對葡萄牙！今場堪稱名帥鬥球王，俄羅斯由「金牌領隊」卡比路執教後，掃走搞事分子同大款，增強團隊紀律性，球隊眾志成城，而且以呢位戰術大師嘅深厚功力，相信有計箝制基斯坦奴朗拿度。葡萄牙擺脫唔到C朗一人球隊陰影，遇上擅長整體戰嘅俄羅斯，勢必輸蝕，平手盤要主隊。

（now 633周五晚11時直播）
卡比路助俄羅斯升呢

俄羅斯之前先後由兩位荷蘭名帥希丁克及艾禾卡特執教，都係雷聲大雨點小。上屆世界盃外圍賽附加賽備受睇好情況下，竟然被斯洛文尼亞淘汰，今屆歐國盃決賽周取得好開局，但最終分組賽出局，並發生艾沙維鬧球迷事件，歸根究柢都係紀律散漫，導致水準不穩。

事實上，處理團結問題一向係荷蘭教練嘅弱項，俄國足總聘請卡比路執教，就搵啱人。呢位意大利籍主帥出名講求紀律，佢上任後，主要揀選効力本土球會人腳，並棄用艾沙維、柏夫里約真高、施哥夫及普格恩耶克等星級國腳，就係貪土炮聽話，有助佢推行鐵腕治軍。足球係團體運動，整體戰比個人力量更重要，俄羅斯喺卡帥領軍下踢兩場外圍賽全勝兼冇失波，證明改革成功。

葡萄牙星味遠勝俄軍，今次大軍除咗C朗，仲有另外兩位皇馬球員比比及法比奧干查奧、曼聯快翼拿尼，但其餘球員級數同C朗有好大差距，尤其係進攻上幫唔到佢。其實C朗好需要隊友支援，唔似美斯可以一人扭過五六個對手。由於皇馬中前場猛將如雲，佢先至可以保持高入球量，返到國家隊，靠自己單打獨鬥，自然舉步維艱。C朗今次遠赴俄羅斯，面對卡比路布下嘅天羅地網，以及一班渴望上位成名嘅東歐硬漢纏繞，情況就如孫悟空跌入如來佛祖嘅五指山，可謂插翼難飛。