西班牙小虎翻炒丹麥

猪拉多纳

U21歐洲國家盃外圍賽已進入到附加賽次回合階段，其中一場由西班牙U21作客丹麥U21。首回合西班牙以五比○狂勝丹麥，似乎雙方實力上有好大差距，預料今場西班牙仍如常向對手施壓，再次大勝不奇，大盤值得留意。

（周三凌晨零時30分開賽）
瑞典意大利獻「細」

西班牙U21為上屆「小歐國盃」冠軍，屬奪標次數第二多球隊，小國腳質素有幾好唔使懷疑。効力巴塞隆拿嘅基斯甸泰路、馬田蒙度亞、馬斯巴查更加係實力嘅保證，三人當中以基斯甸泰路最為突出，今季佢已經喺歐聯取得入球，轉戰U21賽事簡直大超班，加上門將仲要係曼聯球星迪基亞，西班牙可謂「非一般」小國腳。實在U21賽事向來都以個人質素為先，戰術運用相對較次，西班牙今場可憑質大勝，大盤開出機會高。

另外瑞典U21主場對意大利U21，細盤較為可取。首回合意大利佔盡上風，奈何進攻球員把握能力極低，最終僅以一球少勝瑞典。預料今場戰情唔會有太大改變，入球應只會「一球起、兩球止」。

（周三凌晨零時開賽）