富明尼斯爭標賀會慶

猪拉多纳

創會110周年、中場迪高復出、射手費特又要力爭重返國家隊，排巴甲榜首嘅富明尼斯聽朝喺主場迎戰第3位嘅甘美奧，大把理由推動佢哋贏波，教練艾比爾布拉加更加話，上場迪高坐波監停得合時，可以畀佢抖夠迎接今場對甘美奧嘅大戰，信佢要捧1.75倍主W。（開賽時間：周四早上6:30）
甘美奧缺少兩大國腳

其實迪高養傷期間，富明尼斯都冇大走樣，近9場聯賽更取得8勝1負，證明個別主力缺陣唔會冧檔，正如中場堤亞高尼維斯同艾雲華倫西亞分別被巴西同哥倫比亞國家隊徵召，日前富明尼斯都能夠以2:1反勝邦迪比達，更有傳聞話富明尼斯王牌費特會喺下個月獲得巴西國家隊重召，呢場佢肯定發茅爭取士哥，有利開出主勝。

另一方面，對手甘美奧有射手馬些路摩連奴、中場費蘭度奴卡士馬田分別入選玻利維亞同巴西國家隊，實力大打折扣，日前主場面對中游球隊保地花高，更臨天光失波被逼和1:1，今場作客好易出事。