聖保羅弗爆「讓主」熱食

猪拉多纳

聖保羅最近愈戰愈勇，今季仲首次躋身巴甲聯賽榜前4添，為保自由盃參賽席位嚟緊肯定不容有失，適逢攻擊中場盧卡斯洛迪古斯踢完太公波歸隊，聽朝主場恭候包艇嘅戈亞尼恩斯，客隊仲邊有得剩吖？1.72倍「讓主」趁熱食。

（開賽時間：周五早上8:00）
戈亞尼恩斯不設防

聯賽3連勝嘅聖保羅目前排喺巴甲第4位，即使呢支傳統勁旅喺南球盃殺到入16強，門將羅渣里奧都一於少理，賽前講到明來屆重返自由盃舞台最重要，今仗又點會掉以輕心吖？消息指防守中場丹尼遜傷愈可候命，攻擊中場盧卡斯洛迪古斯亦都趕得切歸隊，由佢拍住近3仗場場有波入嘅路爾斯法比安奴攻堅，聽見都得人驚！

對家戈亞尼恩斯條防線30輪聯賽過後勁失53球，過去17場仲場場有失波，聽朝點頂聖保羅嘅進襲呀？據巴西《環球體育》嘅民調顯示，99%球迷睇死揸住23分包艇嘅戈亞尼恩斯降硬班，更雪上加霜嘅，係佢哋嘅球迷早排因為掟煙花入場，家陣畀足總判罰嚟緊對哥連泰斯同山度士兩場比賽去中立場踢，衰開有條路，今鋪唔慌有運行。