廠仔打「雀」麻醉球迷

猪拉多纳

雖然由雲格帶領嘅阿仙奴已經7年無冠，但年年賣球星，就令兵工廠每季都通過球員交易獲得巨額利潤，呢種做法引嚟好多球迷不滿，不過盈利策略就討盡高層歡心，惟有今晚作客諾域治繼續入多啲波麻醉球迷喇！
諾域治不自量力鬥攻盞死

雲格要捧盃冇佢份，但係嗰啲無厘頭獎就攞唔少，剛啱又有一個球會優質服務獎，表揚佢哋為買飛入場睇波嘅球迷提供無微不至嘅服務，恨捧盃恨到發燒嘅廠迷對於呢個獎都唔知嬲定笑好！

幫雲格執教阿仙奴16年計吓條數，佢一共賣走超過20個世界級球星，針冇兩頭利，老細豬籠入水嘅代價係近年冇盃捧，而呢季英超頭兩場冇波入，班廠迷即刻嘈到拆天，好在近排腳風順番，班主亦交帶過唔理好醜最緊要入多啲波，咁樣至係真正嘅優質服務喎！

至於金絲雀為贏波打亂章，上兩場對車仔同紅軍不自量力，對攻玩火自焚，睇怕呢場都唔例外，入多幾粒，球迷有眼福。