華歷簡奴「+1」愛得過

猪拉多纳

今晚西甲好戲連場，其中有場「雙奴之戰」，今季成績大插水嘅愛斯賓奴，喺自己地頭迎戰華歷簡奴。其實「愛奴」演出唔算太曳，但有時好波不如好運，該隊明顯行緊衰運，多次領先下被扳平或反先，遇上硬淨嘅「簡奴」未係反彈時候，華歷簡奴受讓「讓球客勝」值得一試。

（now 632周日晚10時直播）
愛斯賓奴當黑未開齋

邊隊係今季西甲最黑仔球隊？相信非愛斯賓奴莫屬，「愛奴」乃西甲唯一仲未開齋嘅球隊，但如果有睇過該隊比賽嘅球迷，都會戥佢哋唔抵，皆因開季七仗中佢哋有四次先開紀錄，可惜最後竟然只拿得兩分，多次畀對手扳平或反勝，都咪話唔影響士氣。

「愛奴」失去借將菲臘比古天奴同華迪美韋斯後，令佢哋進攻組織大為削弱，加上主力守將域陀艾華利斯今仗亦要停賽，搞到教頭普捷天奴頭都痕埋。

當然，華歷簡奴都唔係好貨色，但上輪贏拉科總算終止三連敗，又有國際賽期過一過冷河，令該隊得到喘息調整嘅機會，而前線新組合比迪、迪里巴錫同巴迪斯達奧經過磨合後，漸漸擦出火花，對住衰運纏身嘅愛斯賓奴，作客有力搶分，「讓球客勝」捧得過。