車仔薩唔住

猪拉多纳

歐聯E組車路士作客烏克蘭薩克達，車仔今季勢如破竹，不但防守依然穩固，由近期瘋狂入波嘅桑馬達、夏薩特及奧斯卡杜斯山度士組成嘅「黃金進攻中場」更係無堅不摧，踢出霸氣足球。現時嘅車路士已達到老闆阿布拉莫域理想中嘅「無敵戰車」，遇上任何對手都未驚過，更何況仲有得受讓，車路士下盤必捧。（有線64及204台周三凌晨2時45分直播）

杜奧巴離隊時，好多球迷擔心車仔冇人識入波，但事實剛好相反，攻力更勝從前，淨係近5仗已轟入20球，而且撇開社區盾及歐超盃呢兩項象徵式賽事外，今季其他11場比賽不敗，現時車路士比捧上屆歐聯冠軍時更加強大，唔好話對薩克達，就算遇上皇馬、巴塞都唔會輸蝕。

車仔成功之處在於領隊迪馬堤奧「因材施教」，用費蘭度托利斯打單箭頭牽制對方中路守將，再配以桑馬達、夏薩特及奧斯卡杜斯山度士後上攻門，各人各施所長，進攻瓣數更多元化，對手更難防範。如果話車仔上屆靠防守奪歐聯，今屆可以堂堂正正踢出霸氣足球，就算今場落後，亦有信心車仔能夠扳平，甚至反勝。由於車路士與薩克達暫時同得4分，同組祖雲達斯亦有力從後趕上，迪馬堤奧不敢怠慢，上仗聯賽收起林柏特，直至補時先至派佢上陣，加上泰利喺英超停賽，可以養精蓄銳應付歐聯，車仔今仗一定出真功夫爭勝，建立出線優勢。
薩克達唔夠卡士讓波

薩克達要讓波，好大程度上因為佢哋位處東歐，對手難免會受舟車勞頓之苦，而且主場已經10連勝，表面上成績好靚，但質量成疑。始終烏克蘭聯賽水平同英超相差一大截，佢哋可以喺國內賽事也文也武，唔代表出戰歐洲賽都掂，上屆分組賽包尾就係最佳證明，薩克達讓波，冇理由唔捧車仔。