皇馬大舉侵略

猪拉多纳

今晚續演歐聯第三輪分組賽，「死亡D組」重頭戲多蒙特主場對皇家馬德。兩軍今季同病相憐，聯賽衞冕之路陷困境，近期都受到防線傷兵問題影響，需要搵中場球員客串後衞，難免會較多甩漏。當然雙方亦同樣具備優秀射手，可以攻城略地。既然大家後防都有缺陷，惟有盡量利用現有本錢，以攻代守豁出去一搏，今場簡單直取入球大。（有線61及201台周四凌晨2時45分直播）

「蜜蜂兵團」多蒙特上仗聯賽輸畀史浩克04，輿論認為係同兩位中場馬里奧葛斯及巴拉斯塞高斯基因傷倦勤有關，但其實最大問題係左閘舒姆沙缺陣，事關球隊守將人腳緊絀，教練高普該仗被迫變陣，改踢三後衞，將中場施雲賓達拉後擔任清道夫，結果證明失敗。多蒙特新陣式頂唔住史浩克04攻擊，試問又點抵禦皇馬來犯。
蜜蜂改352 皇馬二閘荒

不過，多蒙特兩位射手馬高列奧斯及羅拔利雲度夫斯基狀態大勇，前者無論喺球會或德國國家隊都瘋狂入波，包括上輪歐聯攻破曼城大門，以佢高速突破嘅踢法，正好恰死輕出嘅皇馬後衞。羅拔利雲度夫斯基已重拾射門鞋，連續兩場聯賽有波入，呢位波蘭國腳撻着後好難得住。多蒙特今晚要贏皇馬唔易，但應該好大機會入波。

皇馬攻力有幾強、C朗有幾犀利，已經唔使多講，毋須擔心冇波入。但問題係左右二閘馬些路及艾比路亞都受傷，教練莫連奴上仗聯賽惟有安排艾辛客串左閘，中堅沙治奧拉莫斯移往右閘，派19歲小將華拉尼出任中堅。雖然仍以2比0擊敗切爾達，但好大程度因為對手實力差，兼有地利之助，未受真正考驗。今次造訪德國，呢條臨時拉伕防線，難再保持不失。