文仙尼係時候騷哥利

猪拉多纳

今晚歐聯又有好戲上演，上季英超冠軍曼城作客荷甲盟主阿積士。今季曼城喺歐聯被抽入死亡之組預咗難踢，頭兩輪賽事一和一敗只得一分暫時睇晉級形勢其實唔多樂觀，不過今場對手係同組實力較弱嘅阿積士，相信曼城上下都會好好把握機會，希望兩勝阿積士以保住出線希望，Peter對於人腳質素較高嘅曼城較有信心。

曼城喺歐聯表現不佳，Peter覺得領隊文仙尼一定要動腦筋，為球隊尋求新突破。文仙尼經常畀人笑佢一世夠運，當年帶國際米蘭有老闆莫拉堤撐佢，現時喺曼城又有中東大水喉射住，為要證明自己係有料之人，文仙尼有必要喺歐洲賽場交出好成績，今場對於文仙尼嚟講好緊要。
呢兩輪決定出線命運

其實Peter以前都提及過，阿積士並唔係歐洲一流球隊，比較起皇馬、多蒙特及曼城，肯定係最下風嗰隊，加上阿積士近況亦唔係好，曼城今次肯定趁佢病就攞佢命。仲有一點要提出，就係歐聯第三及第四輪賽事好重要，因兩支球隊會連環對決，若然曼城可兩度擊敗阿積士的話，攞番六分就令成個晉級形勢唔同晒。Peter喺度勸文仙尼，當正今場係上季英超煞科日咁踢，總之唔贏冇命啦！

金句：缸瓦船打老虎，盡地「兩」煲