蔚山有霸氣強襲賓約哥

猪拉多纳

南韓代表蔚山現代係今屆亞冠盃四強唯一東亞區代表，今晚首回合遠征烏茲別克鬥賓約哥；自從○九年起，亞冠盃決賽改為一場過，連續三屆都有南韓球隊殺入決賽，呢次輪到蔚山接棒，佢哋喺今屆亞冠盃未嘗敗績，表現突出，有力反客為主，平手盤捧客隊！

（now 671周三晚9時直播）

亞冠盃近年成南韓球隊天下，○九年由浦項制鐵捧盃，一○年到城南一和奪冠，上屆全北汽車喺決賽射輸十二碼飲恨，今屆輪到蔚山現代接力，呢班波踢完分組賽、十六強同八強戰後仍然保持不敗，上圈作客大炒沙特勁旅希拉爾盡顯霸氣，前大阪飛腳射手拉芬夏好搶鏡，今次去到烏茲別克繼續大踢進攻足球，有條件再贏！賓約哥八強鬥澳職球隊阿德萊德聯狼狽晉級，對手實力一般，佢哋兩回合都贏唔到，反映呢隊波級數唔算高，今次主場出擊莊家都開平手盤，擺明睇死佢哋唔掂，一於撐蔚山現代！
伊蒂哈德4強拔頭籌

至於周二凌晨舉行嘅另一場準決賽，由沙特阿拉伯球隊內訌，伊蒂哈德憑主場之利，首回合以一比○小勝吉達艾阿里，次回合賽事於十一月一日舉行。