國米試訓o靚仔 柏迪遜借「細」搵食

猪拉多纳

歐霸盃H組國際米蘭主場迎戰塞爾維亞球隊柏迪遜，意甲球隊一向唔重視呢項「二奶盃」，尤其係國米呢類傳統豪門，眼中只得聯賽同歐聯，教練施特拉馬斯安尼今屆亦往往用後備鋒將踢歐霸，攻力難免打折扣。柏迪遜礙於質素唔及對手，應會採取穩守突擊戰術，靠前韋根門將史杜高域抵禦對手來襲，預料屆時入波唔會多，入球細有2.05倍值博。

（有線61及201台周五凌晨1時直播）

國米教練施特拉馬斯安尼教青年軍出身，歐霸盃變成佢試用小將嘅場所，前兩場分組賽，佢都派20歲嘅菲臘比古天奴及19歲嘅馬高利華查擔任正選，負責進攻重任。上輪作客尼菲治，更加冇徵召兩位射手迪亞高米列圖及卡斯辛奴，反而提拔三位18至19歲青年軍入伍。可見施帥借用歐霸盃培訓新人嘅意圖非常明顯，今仗有地利優勢，隨時更大膽起用更多小將，或影響進攻效率。
柏迪遜怕輸龜縮

柏迪遜喺本土賽事也文也武，取得聯賽五連冠，但去到歐洲賽冇料到，兩場分組賽未贏過，兼冇波入，尤其係主場對魚腩尼菲治，竟然互交白卷，好難期望佢哋可以攻破國米大門。事實上，柏迪遜自知實力有限，相信唔敢同國米鬥攻，應會採取穩守戰術，以免太早失波而難以翻身，預料國米就算贏波，都係小勝居多。值得留意，有超過4千名塞爾維亞球迷到達米蘭，該國fans近年惡名昭彰，隨時搞事影響比賽。