沙豪域做總監 馬里博爾唔赦熱刺

猪拉多纳

歐霸盃J組斯洛文尼亞勁旅馬里博爾主場對英超大軍熱刺，馬里博爾由斯洛文尼亞傳奇球星沙豪域出任體育總監，近年發展愈來愈好，會方兩年前同車路士簽下合作協議，今次對住倫敦球會熱刺可以問「車仔」攞料，呢班波主場好惡，受讓着數到暈，博「讓球主勝」！

（有線64及204台周五凌晨1時直播）
同車仔合作有料收

馬里博爾07至08季度搵來名將沙豪域出任體育總監，近年於國內惡晒，仲頻頻出戰歐洲賽。沙豪域人面廣，兩年前幫球會連結英超名牌球隊車路士，隊內有乜優質新星就會推介畀對方，雙方關係唔錯，今次對住「車仔」同市敵人熱刺，可以搵車路士教練團索料。今場牌面睇馬里博爾處下風，但呢支斯洛文尼亞勁旅主場好惡，分組賽首戰主場大炒希臘球隊彭拿典奈高斯，足見佢哋戰鬥力唔弱。

熱刺教頭保亞斯高度重視歐霸盃，幾乎場場都強陣出擊，誠意十足，可惜戰績麻麻，分組賽兩戰和晒，上次作客彭拿典奈高斯踢落唔多對辦，要應付雙線作戰，似乎都幾吃力。熱刺現時有唔少傷兵，中場柏加、迪比利、守將伊高圖及卡保奧同樣有傷，經過上場硬撼車路士輸波後，大軍無論體力同士氣都受損，今次仲要作客讓波，個盤堅唔抵玩，「讓球主勝」博得過！