紐卡素半力夠剪布

猪拉多纳

英超球隊紐卡素喺歐霸盃D組演出對辦，上次主場對波爾多半力出擊照樣輕鬆大勝，今次再喺聖占士公園球場迎戰比利時大軍布魯日，對手後防離開主場就「門常開」，對上三次作客狂失十粒，甩甩漏漏信唔過，一於捧紐卡素W！

（有線64及204台周五凌晨3時05分直播）

「喜鵲」紐卡素上場喺「東北打吡戰」同新特蘭各一言和，聯賽三戰不勝，不過，「喜鵲」今季喺歐霸盃表現唔錯，分組賽首戰作客葡萄牙球隊馬里迪莫幾近以全副選應戰都唔使輸，上輪返主場收起半隊主力都以3比0輕取波爾多，擺明超超哋，家陣有四分在手，形勢唔錯。「喜鵲」輪換效果好，預期教頭柏杜又會收起部分主將，今場對手只屬普通料，開個齋W唔難！
布魯日作客變軟腳蟹

點解睇死布魯日搶唔到分？望望佢哋啲績就會有答案，呢支比利時球隊喺主場蝦蝦霸霸，但作客例牌變軟腳蟹，近三次作客不勝，加埋失十粒，之前歐霸作客波爾多都淨吞四蛋，上場聯賽造訪奧特海維利又輸一比四，防線發揮好曳，紐卡素唔使出卡比耶及丹巴巴亞等主力喇，求其搵艾美奧比同奧巴坦等人已經夠殺啦！