富明尼斯保江山鬥心爆棚

猪拉多纳

巴甲榜首富明尼斯家陣領先優勢得番６分，今輪聯賽主場對住哥列迪巴，後衞甘姆就話好有信心由呢場開始複製首循環戰績，誓要幫球隊以首名衝線咁話，1.5倍主勝當收息。 （開賽時間：周五早上7:00）

富明尼斯上場作客以2:3不敵排次席嘅明尼路，喺聯賽剩餘6輪嘅情況下，再有乜差池個冠軍真係凍過水。不過佢哋個後衞甘姆輸波後就走出嚟話，決心幫球隊喺最後6輪複製番首循環5勝1和嘅成績，球隊鬥志咁鮮明，再配合埋前鋒費特啱啱攻入加盟球隊後第100個入球嗰種勢頭，真係有可能複製成功o架！
南球盃蒙特維多搵獨立隊報仇

對手哥列迪巴最近喺聯賽6場不敗攞到14分，暫時總算逃離降班漩渦。不過要喺降班區掙扎，歸根究柢係佢哋作客太差兼且太多傷兵。今季作客淨係贏過3隊比自己排名低嘅球隊之餘，仲要輸咗9場，加上沙治奧艾斯古迪路、笠臣米高同派馬奧啱啱傷埋，傷兵名單水蛇春咁長，對住一心爭冠軍嘅富明尼斯邊有得打。

至於南球盃16強都有心水，烏拉圭球隊蒙特維多利物浦主場對住阿根廷嘅獨立隊，要1.9倍主勝。首回合落後1:2嘅蒙特維多利物浦除咗有作客入球喺手外，喺南球盃入咗4球嘅前鋒卡路士紐尼斯亦可上陣數胡，憑住近9仗主場贏咗8場嗰種威力，有力終止獨立隊4連勝走勢。
南球盃賽制

採主客兩回合制，今輪為16強次回合，若總比數相同，作客入球較多一隊晉級，再和則於次回合後隨即互射12碼決勝。